ދިވެހި ރުކާއި ހައިވަކަރު ގަހާ އެކު ވިލިމާލޭގައި 500 ގަސް އިންދައިފި
މިހާރު
1 ޑިސެމްބަރު 2025 | ހޯމަ | 12:38
ސަރުކާރުގެ ފަސް މިލިއަން ގަސް ޕްރޮގްރާމްގެ ދަށުން ވިލިމާލޭގެ އެކި ތަންތަނުގައި 500 ގަސް އިއްޔެ އިންދައިފި އެވެ.
ތިމާވެއްޓާ ބެހޭ މިނިސްޓްރީގެ ނޫސްބަޔާނެއްގައި ބުނީ ރައީސް ޑރ. މުހައްމަދު މުއިއްޒުގެ ފަސް މިލިއަން ގަސް އިންދުމުގެ ޕްރޮގްރާމްގެ ދަށުން ވިލިމާލޭގައި 500 ގަސް އިންދުމުގެ ބޮޑު ހަރަކާތެއް އިއްޔެ ބާއްވާފައިވާ ކަމަށެވެ. އެ ހަރަކާތުގެ މައިގަނޑު މަގުސަދަކީ ވިލިމާލޭގެ ތިމާވެށި ރައްކާތެރިކޮށް، ގަސްގަހާގެހި އިތުރުކުރުން ކަމަށް މިނިސްޓްރީން ބުންޏެވެ.
ވިލިމާލޭގައި އިއްޔެ ހަވީރު ބޭއްވި އެ ހަރަކާތުގައި ތިމާވެއްޓާ ބެހޭ މިނިސްޓަރު ތޯރިގް އިބްރާހިމާއި ސްޕޯޓްސް މިނިސްޓަރު އަބްދުﷲ ރާފިއު އާއި ހެލްތު މިނިސްޓަރު އަބްދުﷲ ނަޒިމް އިބްރާހިމް އަދި ސަރުކާރު ކުންފުނިތަކާއި މިނިސްޓްރީތަކުގެ އިސްވެރިން ބައިވެރިވެވަޑައިގެން، ގަސް އިންދަވާފައިވެ އެވެ.