އަސާސީ ކާބޯތަކެތި ވިއްކަން އެސްޓީއޯގެ ހޯލްސޭލް ސެންޓަރެއް މާލޭގެ ބާޒާރުމަތީގައި ހުޅުވައިފި
މިހާރު
1 ޑިސެމްބަރު 2025 | ހޯމަ | 9:49
ދައުލަތުގެ ވިޔަފާރި ކުންފުނި އެސްޓީއޯ އިން ވިއްކާ އަސާސީ ބާވަތްތަކުގެ އަދަދު މި އަހަރުގެ އޮކްޓޫބަރު 15 އިން ފެށިގެން އިތުރު ކޮށްފައިވާތީ އެ ބާވަތްތައް ވިއްކުން ފުޅާކުރުމަށްޓަކައި މާލޭގެ ބާޒާރުމަތީގައި އާ ހޯލްސޭލް ފިހާރައެއް މިއަދު ހުޅުވައިފި އެވެ،
"އެސްޓީއޯ ޕީޕަލްސް ޗޮއިސް ހޯލްސޭލް ސެންޓަ 2" ހުޅުވީ ކުރީގައި އެސްޓީއޯ ހޯމް އިމްޕްރޫވްމަންޓް ހިންގި އިމާރާތް ނުވަތަ މާލޭ ނޯތު ހާބަރުގެ ގޭޓު ކުރިމަތީގަ އެވެ.
އެސްޓީއޯ އިން ބުނީ، ބާޒާރުމަތީގައި ހޯލްސޭލް ސެންޓަރެއް ހުޅުވުމުގެ ބޭނުމަކީ އަސާސީ ކާބޯތަކެތީގެ ގޮތުގައި ކަނޑައަޅާފައިވާ 23 ބާވަތުގެ އިތުރުން އެ ކުންފުނިން ވިއްކާ ބްރޭންޑުތަކުގެ އުފެއްދުންތައް ހެޔޮ އަގެއްގައި ހޯލްސޭލްކޮށް ވިޔަފާރިވެރިންނަށާއި އާންމުންނަށް ފޯރުކޮށްދިނުމާއި މާލެ އިން ރަށްރަށަށް މުދާ އުފުލާ ބޯޓުތަކަށް އެ ތަކެތި ފަސޭހައިން ލިބޭނެ މަގު ތަނަވަސް ކޮށްދިނުން ކަމަށެވެ.