ގދ. ތިނަދޫ ސިޓީއަކަށް ހެދުމަށް އެ ރަށު ކައުންސިލުން ހަދާފައިވާ އާބާދީގެ ލިސްޓްގައި ބޮޑެތި އޮޅުވާލުންތަކާއި މަކަރާއި ހީލަތް ހަދާފައިވާ ކަމަށް ބުނެ، އެ ލިސްޓަށް ބަލައިގެން ކަންކަން ކައުންސިލްގެ އިންތިހާބުގެ ކަންކަން ނުނިންމުމަށް އެދި އިލެކްޝަން ކޮމިޝަން (އީސީ) އަށް ޝަކުވާ ހުށަހަޅައިފި އެވެ.

އިލެކްޝަން ކޮމިޝަނުން ވަނީ ލޯކަލް ކައުންސިލް އިންތިހާބުގެ އިންތިހާބީ ދާއިރާތައް ކަނޑައެޅުމުގެ ވަގުތީ ލިސްޓު އާއްމުކޮށް ޝަކުވާއަށް ހުޅުވާލައިފަ އެވެ. އެ ކޮމިޝަނުން ކަނޑައަޅާފައިވާ ގޮތުގައި ތިނަދޫ ސިޓީއަށް އިންތިހާބުކުރާނީ މޭޔަރު އަދި ހަ މެމްބަރުންނެވެ. އަދި އަންހެނުންނަށް ހާއްސަކުރީ ދެ ގޮނޑި އެވެ.

އެގޮތަށް ކަނޑައެޅީ ތިނަދޫ ކައުންސިލުން ފޮނުވާފައިވާ 10،150 މީހުންގެ އާބާދީ ލިސްޓަށް ބަލައިގެންނެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން 10،000 އާއި 30،000 އާ ދެމެދުގެ އާބާދީއެއް އޮންނަ ސިޓީއެއްގައި ސިޓީގެ ކައުންސިލްގައި ތިބޭނީ މޭޔަރާ އަދި ހަ ކައުންސިލަރުންނެވެ. ގާނޫނުގައިވާ ގޮތުން 10،000 ދަށުގެ އާބާދީއަކީ ސިޓީއެއް ކަމަކަށް ނުބަލަ އެވެ.

މައުޟޫޢުތަށް