ކުނި އަޅައިގެން އެއްވެސް ތަނެއް ނުހިއްކާނެ: ރައީސް
މިހާރު
22 ޑިސެމްބަރު 2025 | ހޯމަ | 4:56
ކުނި އަޅައިގެން އެއްވެސް ތަނެއް ނުހިއްކާނެ ކަމަށާއި އެއީ ސަރުކާރުން ކުރާނެ ކަމެއް ނޫން ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ހުޅުމާލެ 1 ގެ ރައްޔިތުންނާ އެ މަނިކުފާނު ބައްދަލުކުރައްވަން ބޭއްވި ޖަލްސާގައި ޝަކުވާތަކާއި މައްސަލަތަކާއި ކަންބޮޑުވުންތައް ހުށަހަޅަން ފުރުސަތު ހުޅުވައިލުމުން ވާހަކަ ދެއްކި މީހަކު ބުނީ، މިހާރު ބިން ހިއްކަނީ ކުނި އަޅައިގެން ކަމަށެވެ. އެ ސަރަހައްދުގެ ނަން އެ މީހާ ނުބުނި ނަމަވެސް ބެލެވޭ ގޮތުގައި އޭނާ ދެއްކީ ހުޅުމާލޭގެ ތިން ވަނަ ފިޔަވައްސަށް ބިން އިތުރު ކުރުމަށް މިހާރު ހިއްކަމުންދާ ސަރަހައްދުގެ ވާހަކައެކެވެ.
ރައީސަށް މައްސަލަ ހުށަހަޅަމުން އެ މީހާ ބުނީ، ކުނި އަޅައިގެން ހިއްކަމުންދާ ކަމުގެ "ހެކި" ވެސް އެބަހުރި ކަމަށާއި ކުނި އަޅައި، އޭގެ މައްޗަށް އަޅަނީ މީޓަރު ވެސް ހަމަނުވާ ވަރުގެ "ދޮންވެލިކޮޅެއް" ކަމަށެވެ. އެކަމަކު، އެއީ ސަރުކާރަކުން ކޮށްގެން ވާނެ ކަމެއް ނޫން ކަމަށް ބުނެ ވަރަށް ބޮޑަށް ނުރުހުންވެ، ރައީސްގެ ސަމާލުކަމަށް އެ މައްސަލަ ގެނައެވެ.