ރާއްޖޭގެ ބައެއް ލީޑަރުން، އިންޑިއާއަށް އިސްކަންދޭ 'އިންޑިއާ ފަސްޓް' ސިޔާސަތު އިސް ކުރައްވަނީ ސަލާން ޖެހުމުގެ ބޭނުމުގައި ކަމަށާއި އެއީ ދޫކޮށްލަން ޖެހޭ ވިސްނުމެއް ކަމަށް ކުރީގެ ހޯމް މިނިސްޓަރު އުމަރު ނަސީރު ރޭ ވިދާޅުވެއްޖެއެވެ.

ރާއްޖޭގައި ތިބި އިންޑިއާ ސިފައިން އަނބުރާ ގައުމަށް ފޮނުވާލުމަށް ދިގު މުއްދަތަކަށް ކުރިއަށްގެންދިޔަ ހަރަކާތަކަށް ފަހު ވެރިކަމަށް އައި މި ސަރުކާރުގެ ފުރަތަމަ ދުވަސްކޮޅު އިންޑިއާއާ ގުޅުން ގޯސްވި ނަމަވެސް، އެ ގައުމާ ގުޅުން ރަނގަޅު ކުރަން މިފަހުން ގިނަ މަސައްކަތްތަކެއް ކޮށްފައިވެއެވެ. އެގޮތުން ރައީސް ޑރ. މުހައްމަދު މުއިއްޒު ދެއްވި ދައުވަތަކަށް އިންޑިއާގެ ބޮޑުވަޒީރު ނަރެންދުރަ މޯދީ މާދަމާ ރާއްޖެ ވަޑައިގެން، މިނިވަން ދުވަހުގެ ބައެއް ހަރަކާތްތައް ޝަރަފުވެރިކޮށްދެއްވާނެއެވެ.

މޯދީގެ އެ ދަތުރުފުޅާ ގުޅިގެން ގައުމުގެ ކުރީގެ ބައެއް ލީޑަރުން ވަނީ އިންޑިއާ ފަސްޓް ސިޔާސަތު ރާއްޖެއަށް މުހިންމުވާ ސަބަބުތަކާ ގުޅޭ ގޮތުން ވާހަކަ ދައްކަވައިފައެވެ. އޭގެ ތެރެއިން، އެ މަނިކުފާނުގެ ވެރިކަމުގައި އިންޑިއާއާ ގާތް ގުޅުމެއް ބޭއްވެވި ކުރީގެ ރައީސް މުހައްމަދު ނަޝީދު ވަނީ ރާއްޖެއިން އަބަދުވެސް އިސްކަންދެނީ އިންޑިއާ ފަސްޓް ސިޔާސަތަށް ކަމަށާއި މިހާރު ވެސް ދިވެހި ސިޔާސީ މައިދާނުގެ ވިސްނުމަކީ އެއީ ކަމަށް ވިދާޅުވެފައެވެ.

މައުޟޫޢުތަށް