މަސް މާރުކޭޓު ހަދަން 9.6 މިލިއަން ޑޮލަރު: ކާކު، ކިހިނެއް ކުރި ކަމެއްކަން ވެސް ނޭނގޭ
ސަން
20 އޯގަސްޓު 2025 | ބުދަ | 2:53
މަސް މާރުކޭޓު ހަދަން މާލޭ ސިޓީ ކައުންސިލުން ދެ އެއްބަސްވުމެއް ހަދާފައި އެބައޮތް ކަމަށާއި އޭގެ ތެރެއިން ފަހު އެއްބަސްވުން ހަދާފައި އޮތީ ކާކު ނިންމައިގެން ކިހިނެއް ކަމެއް ވެސް ނޭނގޭ ކަމަށް މާލޭ މޭޔަރު އާދަމް އާޒިމް މިއަދު ވިދާޅުވެއްޖެއެވެ.
ސިޓީ ކައުންސިލްގެ ހަތަރުވަނަ ދައުރުގެ 208ވަނަ ޖަލްސާގައި އާޒިމް ވަނީ މަސް މާރުކޭޓު މަޝްރޫއުގެ ފަހުގެ އަދާހަމަތަކެއް ކައުންސިލަރުންނާ ހިއްސާކުރައްވާފައެވެ. މޭޔަރު ވިދާޅުވީ، މަޝްރޫއު ނުފެށިގެން އުޅެނީ ބޮޑު 'އޮޅުންބޮޅުން ގަނޑެއްގެ' ތެރޭގައި އޮތުމުން ކަމަށެވެ.
އެގޮތުން، މަސް މާރުކޭޓު ހަދަން ދެވަނަ ބަޔަކަށް ހަވާލުކޮށްފައިވަނީ ކުރީގެ މޭޔަރު، ރައީސް ޑރ. މުހައްމަދު މުއިއްޒު ވެރިކަަމަށް އިންތިޚާބުވި ފަހުންނެވެ. އޭރު އާޒިމް ވެސް އިންތިޚާބެއް ނުވެއެވެ. އެހެންވެ، މިކަން ހިނގާފައިވަނީ ޓްރާންސިޝަން މުއްދަތުގައެވެ.