ޔާމީން އުޅެނީ ހަސަދަވެރިވެގެން، ވިލާއިން ދިޔައީ އެއާޕޯޓު ތަރައްގީކުރަމުން: ގާސިމް
ސަން
24 އޯގަސްޓު 2025 | އާދިއްތަ | 8:59
ކުރީގެ ރައީސް އަބްދުالله ޔާމީން އަބްދުލްގައްޔޫމަކީ 'ޒާތީ ހަސަދަވެރިއެއް' ކަމަށާއި ގދ. ކާޑެއްދޫ އެއާޕޯޓަށް ބޭނުންވާ މަރާމާތާއި، ހިންގުމުގެ ޚަރަދުތައް ދިޔައީ ހުއްޓުމެއް ނެތި ކުރަމުން ކަމަށް ވިދާޅުވެ ޖުމްހޫރީ ޕާޓީގެ ލީޑަރު އަދި މާމިނގިލީ ދާއިރާގެ ރައްޔިތުންގެ މަޖިލީހުގެ މެންބަރު ގާސިމް އިބްރާހީމް ރޭ ރައްދުދެއްވައިފިއެވެ.
ގާސިމްގެ ކުންފުނި، ވިލާ އެއާގެ ދަށުގައި އޮތް ކާޑެއްދޫ އެއާޕޯޓަށް އެ ކުންފުނިން ވައުދުވި ތަރައްގީ ނުގެނެސް އޮއްވައި، ލީސް އެގްރިމަންޓު ބާތިލުކޮށް ދައުލަތަށް އެއާޕޯޓު ނެގުމަށްޓަކައި ވިލާއަށް 18 މިލިއަން ޑޮލަރު ދޭން ސަރުކާރުން ހުށަހަޅައިފައި އޮތުމުން ގިނަ ބަޔަކު ވަނީ ކަންބޮޑުވުން ފާޅުކުރަން ފަށައިފައެވެ.
މިދިޔަ ބުރާސްފަތި ދުވަހުގެ ރޭ ޕީއެންއެފުން ބޭއްވި ވޭކްއަޕް ޖަލްސާގައި ކުރީގެ ރައީސް ޔާމީން ވެސް ވަނީ ކާޑެއްދޫ އެއާޕޯޓާ ގުޅުވައި ތުހުމަތުތަކެއް ކުރައްވައިފައެވެ. އެގޮތުން، ކާޑެއްދޫ އެއާޕޯޓުގެ ލީސް އެގްރިމަންޓު ބާތިލުކޮށް ދައުލަތަށް ނަގަނީ، ވިލާ އެއާއިން ދައުލަތަށް ދައްކަންޖެހޭ 33 މިލިއަން ޑޮލަރުގެ ޓެކްސް ފައިސާ މައާފުކުރާ ގޮތަށްކަމަށް އެ މަނިކުފާނު ވިދާޅުވިއެވެ. އަދި، ފެންނަ މަންޒަރަކީ، އެ އެއާޕޯޓު "ހިންގަން އުޅެއުޅެ ނުހިންގިގެން ސަރުކާރުން އެ ތަން ބޮލުގައި އަޅަންޖެހުނު" ތަން ކަމަށް ޔާމީން ވިދާޅުވިއެވެ.