ކުޅުދުއްފުށީ ފަރަށް ދެ އަހަރު ކުރިން އެރި ބާޖު ފުން ކުރަން ކޯޓުން އަމުރުކޮށްފި
ސަން
10 ސެޕްޓެމްބަރު 2025 | ބުދަ | 11:29
ހދ. ކުޅުދުއްފުށީ ފަރަށް، މީގެ ދެ އަހަރު ކުރިން އެރި ބާޖު ފުންކޮށް، އެ ސަރަހައްދު ސާފު ކުރުމަށް ސިވިލް ކޯޓުން މިއަދު އަމުރުކޮށްފިއެވެ.
ދެހާސް ތޭވީސް ވަނަ އަހަރުގެ ޖުލައި މަހު، ކުޅުދުއްފުށީ ފަރަށް އެރީ، ގާތްގަނޑަކަށް 6000 ޓަނުގެ ހިލަ ބަރުކޮށްގެން އެ ރަށަށް ދިޔަ، ޓިއާން ޖިއާން ނަމަކަށް ކިޔާ ބާޖެކެވެ. މި ބާޖު ފުން ކުރަން ހަވާލުކޮށްފައި އޮތީ ބީއެމްސީ ސްލިޕްވޭ އެންޑް ސަލްވޭޖް ކޮމްޕެނީ ކިޔާ ކުންފުންޏަކާއެވެ.
ކުޅުދުއްފުށީ ހުޅަނގު އުތުރު ފަރާތު ފަރު މައްޗަށް މި ބާޖު ބީއްސާލުމުގެ ސަބަބުން ލިބޭ ގެއްލުމާހުރެ، މި މައްސަލަ ކޯޓަށް ހުށަހެޅީ އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) ނުވަތަ މިހާރުގެ ނަމުން ނަމަ އެންވަޔަރަންމަންޓަލް ރެގިއުލޭޓަރީ އޮތޯރިޓީންނެވެ. މި މައްސަލަ ސިވިލް ކޯޓުގައި ރަޖިސްޓްރީ ކުރީ މި އަހަރު ކުރީކޮޅެވެ.