ސަރުކާރަށް މީޑިއާތައް ކޮންޓްރޯލު ކުރެވޭގޮތަށް، ސަރުކާރު ހިންގާ ޕީއެންސީގެ ސުޕަމެޖޯރިޓީއިން އިއްޔެ މީޑިއާ ބިލު ފާސްކުރީ މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ)އާއި ނޫސްވެރިން ހުށަހެޅި ކަންބޮޑުވުންތަކަށް އެއްވެސް ހައްލެއް ނުގެނެސްދީ ކަމަށް އެ ޖަމިއްޔާއިން މިރޭ ބުނެފިއެވެ.

ބިލު ފާސްކުރުމާ ގުޅިގެން، އެ ކަމުގެ ކަންބޮޑުވުން ފާޅުކުރުމަށް މިރޭ އެ ޖަމިއްޔާއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޖޭއޭގެ ރައީސް އަހްމަދު ނާއިފް މި ބިލު މަޖިލީހުން ފާސްކުރީ، ނޫސްވެރިން އެދުނު އިސްލާހުތަކާއެކު ނޫން ކަމަށާއި، އެހެން ބުނުމަކީ ވަރަށް ބޮޑު ދޮގެއް ކަމަށެވެ.

އެގޮތުން މީޑިއާތައް ރެގިއުލޭޓުކުރަން އޮންނަންވާނީ ސެލްފް ރެގިއުލޭޓަރީ ނިޒާމެއްކަމަށް ތަކުރާރުކޮށް ނޫސްވެރިން ބުނަމުންދިޔައިރު ވެސް، ބިލުގެ ސަބަބުން އެ ނިޒާމު އެއްކޮށް އުވައިލެވޭކަމަށް ނާއިފް ވިދާޅުވިއެެވެ. އަދި އުފަންވަނީ ސަރުކާރުގެ ނުފޫޒާއި ބާރު އޮންނަ ނިޒާމެއްކަމަށް އޭނާ ވިދާޅުވިއެވެ.

މައުޟޫޢުތަށް