ހުއްދަ ނުހޯދައި، އައިކޮމްގެ މުވައްޒަފުންނަށް އައު އެލަވެންސެއް ދޭން މިލިއަނެއް ޚަރަދުކުރި
ސަން
3 އޮކްޓޯބަރު 2025 | ހުކުރު | 6:51
ނެޝަނަލް ޕޭ ކޮމިޝަންގެ ހުއްދަ ނުހޯދައި، އިންފޮމޭޝަން ކޮމިޝަނަރުގެ އޮފީސް (އައިކޮމް)އިން އަހަރަކަށް ވުރެ ގިނަ ދުވަހު، އައު އެލަވެންސެއް ދިނުމަށް އެއް މިލިއަނަށް ވުރެ ގިނަ ރުފިޔާ ޚަރަދުކުރި ކަމަށް އޮޑިޓު ރިޕޯޓުގައި ބުނެފިއެވެ.
އޮޑިޓާ ޖެނެރަލްގެ އޮފީހުން އާންމުކުރި އައިކޮމްގެ އޮޑިޓުގައި ވަނީ، ދައުލަތުގެ މުސާރައިގެ ސިޔާސަތުގެ ގާނޫނުގެ ދަށުން ދައުލަތުގެ މުވައްޒަފުންނަށް މުސާރައާއި އިނާޔަތް ކަނޑައެޅުމުގައި ނެޝަނަލް ޕޭ ކޮމިޝަނުގެ ހުއްދަ ހޯދަން ޖެހޭ ކަމަށެވެ.
އެކަމަކު، އެ ގާނޫނާ ޚިލާފަށް އައިކޮމްއިން މިދިޔަ އަހަރުގެ ޖަނަވަރީ މަހުން ފެށިގެން މިދިޔަ ޖުލައި މަހު 31ގެ ނިޔަލަށް ޕޭ ކޮމިޝަނުގެ ހުއްދައަކާ ނުހޯދައި، އެ އޮފީހުގެ މުވައްޒަފުންނަށް ލިވިން އެލަވަންސް ދީފައިވާ ކަމަށް އޮޑިޓުގައިވެއެވެ.