އިސްލާހީ ބަދަލުތައް ފުނޑުވާތަން ބަލަން ނުތިބޭނަން، ދައުލަތް ލޫޓުވުން ހުއްޓުވާނަން: ޝާހިދު
ސަން
3 އޮކްޓޯބަރު 2025 | ހުކުރު | 9:25
އެމްޑީޕީން ރާއްޖެއަށް ގެނައި އިސްލާހީ ބަދަލުތައް ފުނޑުވާތަން ބަލަން ނުތިބޭނެކަމަށާއި، މިހާރުގެ ސަރުކާރުން "ދައުލަތް ލޫޓުވަން" ކުރަމުން އަންނަ މަސައްކަތް ހުއްޓުވާނެކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިރޭ ވިދާޅުވެއްޖެއެވެ.
އެތައް ސަތޭކަ ބަޔަކާއެކު, މިރޭ އާޓިފިޝަލް ބީޗުގައި އެމްޑީޕީން ބާއްވާ "ލޫޓުވައިފި، ލޫޓުވައިފި" ބޮޑު އެއްވުމުގައި ވާހަކަދައްކަވަމުން، ޝާހިދު ވިދާޅުވީ އެމްޑީޕީއަކީ ރާއްޖެއަށް ސުލްހަވެރި ސިޔާސީ ހަރަކާތް ތައާރަފްކުރި ޕާޓީ ކަމަށެވެ.
އަދި ސުލްހަވެރި ސިޔާސީ ހަރަކާތުގެ ތެރެއިން ރާއްޖެއަށް މުހިންމު އިސްލާހީ ބަދަލުތައް ގެނައީ ވެސް އެމްޑީޕީން ކަމަށް ޝާހިދު ވިދާޅުވިއެވެ. ނަމަވެސް މިއަދު ފެންނަނީ އެ ކަންކަން އޮޔައިގޮސް، ފުނޑުފުނޑުވާތަން ކަމަށާއި، އެ މަންޒަރު ބަލަން ނުތިބޭނެކަމަށް ޝާހިދު ވިދާޅުވިއެވެ.