ފުވައްމުލަކަށް ބޯފެން ގެންގޮސްފި، މުޅި މައްސަލަ ހައްލުކުރަން ދެ ދުވަސް ނަގާނެ
ސަން
11 ނޮވެމްބަރު 2025 | އަންގާރަ | 9:49
ފެނުގެ ޚިދުމަތް ކުއްލިއަކަށް މެދު ކެނޑިފައިވާ ފުވައްމުލަކު ރައްޔިތުންނަށް ބޭނުންވާ ބޯފެން އެ ރަށަށް މިހާރު ގެންގޮސްފައިވާ ކަމަށާއި ގޭބިސީތަކަށް ފެން ބެހުމުގެ މަސައްކަތް ކުރަމުން އަންނަ ކަމަށް, ފުވައްމުލަކު ސިޓީ ކައުންސިލުން މިއަދު ބުނެފިއެވެ.
ގާތްގަނޑަކަށް 11,000 އެއްހާ މީހުންގެ އާބާދީއެއް އޮންނަ ފުވައްމުލަކަށް ފެނުގެ ޚިދުމަތް ފޯރުކޮށްދޭ, ފެނަކައިގެ ޕްލާންޓަށް ދިމާވި މައްސަލައަކާ ގުޅިގެން އިއްޔެއިން ފެށިގެން އެ ރަށަށް ފެން ލިބުމުގައި ވަނީ ދަތިތަކަކާ ކުރިމަތިވެފައެވެ. ފުވައްމުލަކީ ޓޫރިސްޓުން ވެސް ގިނަ އަދަދަކަށް ގޮސް ޗުއްޓީ ހޭދަ ކުރާ ވަރަށް ރީތި މަންޒިލެކެވެ.
'ސަން'އިން ސުވާލުކުރުމުން ފުވައްމުލަކު ހުޅަނގު އުތުރު ދާއިރާގެ ކައުންސިލަރު އާއިޝަތު އަބްދުލްޤާދިރު, މިއަދު ވިދާޅުވީ، ފުވައްމުލަކަށް ސަރުކާރުންނާއި ސިފައިން ފެން ފޯރުކޮށްދީފި ކަމަށާއި، ފެން ބޭނުންވާ ގޭބިސީތަކަށް ފެން ދޫކުރުމުގެ މަސައްކަތް ކުރިއަށް އެބަދާ ކަމަށެވެ.