ޕީޖީ ލީޑަރަކަށް ހުންނަވާ އަލީ އާޒިމް އުޅުއްވީ ފައްޔާޒް ބޭރުކޮށް، ވެރިކަން ބަދަލުކުރަން: އިކްރާމް
ސަން
12 ޑިސެމްބަރު 2025 | ހުކުރު | 12:08
އެމްޑީޕީގެ ޕާލިމެންޓްރީ ގްރޫޕު (ޕީޖީ)ގެ ލީޑަރަކަށް މިދިޔަ 19 ވަނަ ރައްޔިތުންގެ މަޖިލީހުގައި ހުންނަވާ އަލީ އާޒިމް އުޅުއްވީ އޭރުގެ އިކޮނަމިކް މިނިސްޓަރު ފައްޔާޒް އިސްމާއިލް މަގާމުން ދުރުކޮށް، އެމްޑީޕީގެ ވެރިކަން ވެސް ބަދަލުކުރަން ކަމަށް އޭރުގެ ދިއްގަރު ދާއިރާގެ މެންބަރު އިކްރާމް ހަސަން ރޭ ތުހުމަތުކުރައްވައިފިއެވެ.
މާލޭ ސިޓީގެ މޭޔަރުކަމަށް އެމްޑީޕީގެ ޕްރައިމަރީގައި މިހާރު ހުންނެވި މޭޔަރު އާދަމް އާޒިމާއި އަލީ އާޒިމް ވާދަކުރެއްވުމުން، ދެ ބޭފުޅުންގެ ވާދަވެރިކަން ވަނީ ބޮޑުވެފައެވެ.
އާދަމް އާޒިމް ކެމްޕޭނަށް ރޭ ހުޅުމާލޭގައި ބޭއްވި "ދެން ވެސް އެމްޑީޕީ އާދަމް ޢާޒިމް ހުޅުމާލެ" ބައްދަލުވުމުގައި ވާހަކަދައްކަވަމުން އިކްރާމް ވަނީ އަލީ އާޒިމަށް ވަރަށް ބޮޑަށް ފާޑުވިދާޅުވެފައެވެ. އޭނާ ވިދާޅުވީ، ދެ އާޒިމްކުރެން އިޚުލާސްތެރި ޚިދުމަތެއް ކޮށްދެއްވަނީ އާދަމް އާޒިމް ކަމަށެވެ.