ގަމު ހޮސްޕިޓަލް، ޓާޝިއަރީ ފެންވަރަށް ބަދަލު ކުރަން ގިނަ މަސައްކަތްތަކެއް ކުރެވިއްޖެ: ސީއީއޯ
ސަން
16 ޑިސެމްބަރު 2025 | އަންގާރަ | 1:00
ގާތްގަނޑަކަށް 14,000 އެއްހާ މީހުންގެ އާބާދީއެއް އޮންނަ, ލ. އަތޮޅުގެ ރީޖަނަލް ހޮސްޕިޓަލް ކަމަށްވާ, ގަމު ހޮސްޕިޓަލް, ޓާޝިއަރީ ފެންވަރަށް ބަދަލު ކުރަން, މި ވޭތުވެދިޔަ ދެ އަހަރު ތެރޭގައި ގިނަ މަސައްކަތްތަކެއް ކޮށްފައިވާ ކަމަށް އެ ހޮސްޕިޓަލުން މިއަދު ބުނެފިއެވެ.
މި ސަރުކާރުގެ ފުރަތަމަ ދެ އަހަރުގެ ކާމިޔާބީއާ ގުޅޭގޮތުން ހެލްތު މިނިސްޓްރީއަށް ދެއްވި ވީޑިއޯ އިންޓަވިއޫއެއްގައި ގަމު ރީޖަނަލް ހޮސްޕިޓަލްގެ ސީއީއޯ އަބްދުލް ހަންނާން އަބްދުލް ރަހީމް ވިދާޅުވީ ވޭތުވެދިޔަ ދެ އަހަރު ތެރޭގައި ވަނީ, އެ ހޮސްޕިޓަލް, ޓާޝިއަރީ ހޮސްޕިޓަލަކަށް ބަދަލު ކުރުމަށް ކުރަން ޖެހޭ މުހިންމު މަސައްކަތްތަކެއް ކޮށްފައި ކަމަށެވެ.
އެގޮތުން މި ވަގުތު އެ ހޮސްޕިޓަލުގައި ނެތް ޚާއްސަ ބަލިތަކެއްގެ ޑޮކްޓަރުންތަކެއް ހޯދުމުގެ މަސައްކަތް ނިމިފައިވާ ކަމަށް އޭނާ ވިދާޅުވިއެވެ. އެގޮތުން ވަރަށް އަވަހަށް ހިތުގެ ބައްޔާއި ނާރުގެ ބަލިތަކާއި ކިޑްނީގެ ބަލިތަކަށް ފަރުވާ ދޭ ޑޮކްޓަރުންތަކެއް އެ ހޮސްޕިޓަލާ ގުޅޭނެ ކަމަށް އޭނާ ވިދާޅުވިއެވެ.