ސަރުކާރަށްވުރެ ގިނަ ކަންކަން ކައުންސިލްތަކުން ކޮށްދޭ، އާންމުން ވެސް މާ ހިތްހަމަޖެހޭ: ޣަފޫރު
ސަން
12 ޖެނުއަރީ 2026 | ހޯމަ | 4:01
ސަރުކާރުން އަހަރެއްގެ ތެރޭ ކޮށްދޭ ކަންކަމަށް ވުރެ މާ ގިނަ ކަންކަން ކައުންސިލުތަކުން ކޮށްދޭ ކަމަށާއި ކައުންސިލުތަކުން ދޭ ޚިދުމަތްތަކާ ދޭތެރޭ ރަށްރަށާއި ސިޓީތަކުގެ ރައްޔިތުން މާ ހިތްހަމަޖެހޭ ކަމަށް އިދިކޮޅު އެމްޑީޕީގެ ވަގުތީ ޗެއާޕާސަން ޢަބްދުލްޣަފޫރު މޫސާ (ގަޕޯ) މިއަދު ވިދާޅުވެއްޖެއެވެ.
އެމްޑީޕީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ޢަބްދުލްޣަފޫރު ވިދާޅުވީ، ޖުމުލަ ގޮތެއްގައި ސަރުކާރުން ފޯރުކޮށްދޭ ޚިދުމަތްތަކަށް ވުރެ ކައުންސިލުތަކުން މާ ގިނަ ޚިދުމަތްތައް މާ "ނަލަކޮށް، ފަރިކޮށް" ފޯރުކޮށްދީފައި އެބަހުރި ކަމަށެވެ.
"އެންމެ ފަހުން އެމްއެންޔޫއިން ކުރި ދިރާސާއެއް، އެއީ 2024ވަނަ އަހަރު ކުރި ދިރާސާއިން ދައްކާ ގޮތުގައި ރައްޔިތުން އެންމެ ބޮޑަށް ހިތްހަމަޖެހެނީ ކައުންސިލުތަކުން ދޭ ޚިދުމަތްތަކާ ދޭތެރޭގައި، ރައްޔިތުންނެއް ނުބުނޭ ފެނަކައިންދޭ ޚިދުމަތް، ނޫނިއްޔާ ސްކޫލުގެ ޚިދުމަތް، ނޫނިއްޔާ ހެލްތު ސެންޓަރުގެ ޚިދުމަތް މާ މޮޅެކޭއެއް،" ޢަބްދުލްޣަފޫރު ވިދާޅުވިއެވެ.