ޞާލިޙުގެ ސަރުކާރުގައި މިސްކިތްތަކަށް ގެއްލުންދިން މީހުންނަށް އަދަބެއް ނުދޭ: ޤާސިމް
ސަން
11 ފެބްރުއަރީ 2026 | ބުދަ | 10:54
ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި މިސްކިތްތަކަށް ގެއްލުންދިން މީހުންނަށް ސަރުކާރުން އެއްވެސް އަދަބެއް ދީފައިނުވާ ކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ޤާސިމް އިބްރާހީމް މިއަދު ވިދާޅުވެއްޖެއެވެ.
މިސްކިތްތަކަށް ގެއްލުންދިނުމަކީ ޓެރަރިޒަމްގެ ކުށަކަށް ހެދުމަށް ގަލޮޅު އުތުރު ދާއިރާގެ އެމްޑީޕީ މެންބަރު މުޙައްމަދު އިބްރާހީމް ހުށަހެޅުއްވި ބިލަށް ބަހުސްކުރައްވަމުން، މިދިޔަ އެމްޑީޕީ ސަރުކާރުގައި ވެސް 2023ވަނަ އަހަރުގެ ރިޔާސީ އިންތިޚާބާ ޖެހެންދެން ކޯލިޝަން ޕާޓްނަރެއްގެ ގޮތުގައި ހުންނެވި ޤާސިމް، ސީދާ ބިލަށް ތާއީދުކުރައްވާ ކަމަށް ނުވަތަ ނުކުރައްވާ ކަމަށް ވެސް ވިދާޅެއްނުވެއެވެ.
އެކަމަކު ޤާސިމް ވިދާޅުވީ، މިސްކިތްތަކަށް ގެއްލުންދިނުން ހުއްޓުވަން ގާނޫނެއް ހެދިގެން ދިއުން ޚާއްސަ ކަމަށާއި ނަމަވެސް އާންމު ގާނޫނުގެ ތެރެއިން މިހާރު ވެސް މިސްކިތްތަކަށް ގެއްލުންދޭ މީހުންނަށް ބޮޑެތި އަދަބުތައް ދެވެން އެބައޮތް ކަމަށެވެ.