ސްނޯކްލިން އަށް ގޮސް އުޅެނިކޮށް ބުރަފަތީގެ ޖެހި މަރުވި ކުއްޖާގެ މައްސަލަ، އާއިލާއިން އަމިއްލަ ތަހުގީގެއް ކުރަނީ!
ދަޕްރެސް
30 ޖޫން 2025 | ހޯމަ | 10:48
އދ. ދިގުރަށް ކައިރިއަށް ސްނޯކްލިންއަށް ގޮސް އުޅެނިކޮށް ދޯންޏެއްގެ ބުރަފަތީގައި ޖެހި މަރުވި 15 އަހަރުގެ ކުއްޖާގެ މަރުވި މައްސަލަ އަމިއްލަ ގޮތުން ބަލަމުން އަންނަކަމަށް އެ ކުއްޖާގެ މައިންބަފައިން ބުނެފިއެވެ.
ބޭރުގެ މީޑިއާތަކުން ރިޕޯޓްކޮށްފައިވާ ގޮތުން ސިންގަޕޫރުގެ އެސްޓީ ޖޯސެފްސް އިންސްޓްޓިއުޓް (އެސްޖޭއައި) ކިޔަވަމުން ދިޔަ ޖެނާ ރާއްޖެ އައިސްފައިވަނީ މޯލްޑިވްސް ވޭލް ޝާކް ރިސާޗް ޕްރޮގްރާމް (އެމްޑަބްލިއުއެސްއާރުޕީ) އަށެވެ. ސްޓަޑީ ޓުއާއެއްގައި ރާއްޖެއައި ޖެނާ ސްނޯކްލިންއަށް ގޮސް އުޅެނިކޮށް ދޯނީގެ ބުރަފަތީގައި ޖެހިގެން ދިގުރަށު ސިއްހީ މަރުކަޒަށް ގެންދިޔައިރު ވެސް އޮތީ މަރުވެފައިވާކަމަށް އެ ސިއްހީ މަރުކަޒާ ހަވާލާދީ ފުލުހުން ވަނީ އޭރު ބުނެފައެވެ.
ޖެނާގެ މަރުގެ މައްސަލައިގައި ދެ ފުށް ފެންނަ ތަހުގީގެއް ހިންގުމަށް އޭނާގެ ބެލެނެވެރިންވަނީ މީގެ ކުރިންވެސް ގޮވާލާފައެވެ. އަދި އޭނާ މަރުވި މައްސަލައިގެ ތަހުގީގު އެކަށީގެންވާ ގޮތަށް ދިވެހި ފުލުހުން ކުރިއަށް ގެންގޮސްފައިނުވާ ކަމަށާއި ކުއްޖާ މަރުވި ސަބަބު ދެނެގަތުމަށް ޕޯސްޓު މޯޓަމް ހަދަންވެސް ފުލުހުން ހުށަހަޅާފައިނުވާ ކަމަށް ބުނެ މީގެ ކުރިންވެސް އެއާއިލާއިން ވަނީ ކަންބޮޑުވުންފާޅުކޮށްފައެވެ.