ހޯކްސް މައްސަލައިގައި ކަސްޓަމްސް އިން ހިއްސާކޮށްފައިވަނީ ނުބައި ޓައިމްލައިނެއް: 241 ކޮމިޓީ
ދަޕްރެސް
9 ޖުލައި 2025 | ބުދަ | 3:58
ތެލުގެ ވިޔަފާރިކުރާ ހޯކްސް ކުންފުނީގެ ބޯޓެއް ކަމަށްވާ 'އެމްޓީ ހޯކްސް ޖަވާހިރު' ގައި ވަގަށް ރާއްޖެ އެތެރެ ކުރަން އުޅުނު ގިނަ އަދަދެއްގެ ސިނގިރޭޓު ފޮށިތަކެއްގެ މައްސަލައިގައި ކަސްޓަމްސް އިން ފުރަތަމަ ހިއްސާ ކޮށްފައިވަނީ ނުބައި ޓައިމްލައިނެއް ކަމަށް މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ބުނެފިއެވެ.
އެގޮތުން އެކަން، ކޮމިޝަނާ ޖެނެރަލް އޮފް ކަސްޓަމްސްގެ ސަމާލު ކަމަށް ކޮމިޓީން ގެނައުމުން ފަހުން ތެދު މައުލޫމާތު ހިއްސާކުރިކަމަށާއި، ގާނޫނުން މަތިކޮށްފައިވާ ޒިންމާތައް އަދާކުރުމުގެ ގާބިލްކަން ކަސްޓަމްސްގައި ނެތްކަން ދޭހަވާ ގޮތަށް ކަސްޓަމްސް އޮފިސަރުން ވާހަކަ ދެއްކިކަމަށްވެސް އެ ކޮމިޓީ އިން ވަނީ ބުނެފައެވެ. އަދި އެރޭ ހޯކްސް ބޯޓު ކަރިއަށްދާން ފުރަތަމަ ލޯންޗެއް ވެސް ނުލިބުނު ކަމަށް ކަސްޓަމްސް އިން ބުނި ކަމަށްވެސް ކޮމިޓީ އިން ވަނީ ފާހަގަކޮށްފައެވެ.
މި މައްސަލަ އާއި ގުޅިގެން އެ ކޮމިޓީން ބޭއްވި ބައްދަލުވުމެއްގައި މެމްބަރަކު ވަނީ މި މައްސަލަ ޕްރޮސެކިއުޓާ ޖެނެރަލް އޮފީހަށް ފޮނުވިތާ 2 މަސް ފާއިތުވެގެން ދިޔައިރުވެސް މައްސަލަ ކުރިއަށް ނުދާކަމަށާއި، މައްސަލަ ކުރިއަށް ނުދަނީ ފައިސާއާ ކޮރަޕްޝަން މީގެ ތެރެއަށް ވަދެފައި އޮތް ވަރުން ކަމުގައި ތުހުމަތު ކުރައްވާފައެވެ. އެގޮތުން ދިއްގަރު ދާއިރާގެ މެންބަރު އަދި ރައްޔިތުންގެ މަޖިލިހުގެ ނައިބު ރައީސް އަހުމަދު ނާޒިމް ވިދާޅުވީ ހޯކްސްގެ މައްސަލަ ކޮމިޓީން ބަލަން ފެށިއިރު، މިހާރުގެ ޕޮލިސް ކޮމިޝަނަރު އިސްމާއިލް ނަވީން ހޯކްސް ކުންފުނީގެ ހިއްސާދާރުންގެ ގެއަށް ވަޑައިގެންނެވި ކަމަށެވެ.