މީޑިއާ ރެގިއުލޭޓް ކުރާ ބިލާ ގުޅިގެން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލް އާއި ޔޫތު މިނިސްޓަރު އިބްރާހިމް ވަހީދު (އަސްވާޑު) ނޫސްވެރިންނާ ބައްދަލުކޮށް މީޑިއާއަށް ހުރަސް އެޅޭނެ އެއްވެސް ކަމަކަށް ސަރުކާރުން ތާއީދު ނުކުރާނެ ކަމަށް ވިދާޅުވެއްޖެއެވެ.

މި ދެ ބޭފުޅުން ނޫސްވެރިންނާ މިއަދު ބައްދަލުކޮށްފައި ވަނީ އެ ބިލާ ގުޅިގެން ނޫސްވެރިން ކަންބޮޑުވުން ފާޅުކޮށް ސަރުކާރުގެ އިސްވެރިންނާ ބައްދަލުވާން ގޮވާލަމުން ދަނިކޮށެވެ. އެގޮތުން ނޫސްވެރިންނާ މި ދެބޭފުޅުން ނުރަސްމީކޮށް ބައްދަލުކުރައްވާފައި ވަނީ ރައީސް އޮފީހުގެ ބޭރުގައި ހުންނަ "މީޑިއާ ފެންޑާ" ގައެވެ.

ހަލީލް އާއި އަސްވާޑު އެތަނަށް ވަޑައިގަތުމާ އެކު ނޫސްވެރިން ވަނީ އެ ބިލުގައި ހުރި ނޫސްވެރިންގެ ކަންބޮޑުވާ ވަކިވަކި މާއްދާތަކާ ގުޅޭ ގޮތުން ސުވާލު ކޮށްފައެވެ. އެ ދެ ބޭފުޅުން ވެސް ވިދާޅުވެފައި ވަނީ ނޫސްވެރިންނާއި މީޑިއާގެ މަސައްކަތަށް ހުރަސް އެޅޭނެ އެއްވެސް ކަމަކަށް ސަރުކާރުން ތައީދު ނުކުރާނެ ކަމަށެވެ. ނަމަވެސް ސަރުކާރުގެ ސްޓޭންޑަކީ އެއީ ކަމަށް ވާ ނަމަ، މަޖިލީހުގައި ސަރުކާރު ތަމްސީލު ކުރައްވާ ޕީއެންސީގެ މެންބަރުންގެ ފުރިހަމަ ތާއީދާއެކު މަޖިލީހަށް އެ ބިލު ބަލައިގަތް ސަބަބާ މެދުގައި ސުވާލު އުފެދޭ ކަމަށް ނޫސްވެރިން ތަކުރާރުކޮށް ސުވާލު އުފައްދާފައި ވެއެވެ.

މައުޟޫޢުތަށް