ބޭސް ނުލިބޭކަމަށް ބުނެ ހުށަހެޅި ކުއްލި މައްސަލަ ބޭރުކޮށްލައިފި
ދަޕްރެސް
26 ނޮވެމްބަރު 2025 | ބުދަ | 11:37
ދިވެހިރާއްޖޭގައި ޑޮކްޓަރީ ބޭސް ލިބުމުގެ ދަތިކަން އިންތިހާއަށް ބޮޑުވެ، އެތައް ބައެއްގެ ފުރާނައަށް ނުރައްކާވާ ހިސާބަށް ގޮސްފައިވާކަމަށް ބުނެ، މި މައްސަލަ ސަރުކާރުގެ ސަމާލުކަމަށް ގެނައުމަށް ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހެޅި މި މައްސަލަ ބޭރުކޮށްލީ 36 މެންބަރުންގެ ވޯޓާއެކުގައެވެ. މި މައްސަލަ ކުރިއަށް ގެންދިއުމަށް ވޯޓު ދިނީ 11 މެންބަރުންނެވެ. މި މައްސަލަ ބޭރުކޮށްލުމާއި ގުޅިގެން މުހައްމަދު އިބްރާހީމް ވިދާޅުވީ ބޭސް ލިބުމުގައި ދަތިކަން އުޅޭކަން ރައްޔިތުންގެ މަޖިލީހަށް ގަބޫލެއް ނުކުރެވުނު ކަމަށެވެ.
މިއަދު ގެ ޖަލްސާއަށް މުހައްމަދު އިބްރާހީމް ހުށަހެޅުއްވި ކުއްލި މައްސަލައިގައިވަނީ ރާއްޖޭގައި ޑޮކްޓަރީ ބޭސް ލިބުމުގެ ދަތިކަން އިންތިހާއަށް ބޮޑުވެ، ރައްޔިތުންގެ ޝަކުވާތައް އިންތިހާއަށް ގިނަވެފައިވާކަމަށެވެ. މީގެ ކުރިން އާސަންދައިން ލިބެމުންދިޔަ ބޭސްތައް ދިނުން އާސަންދައިން ހުއްޓާލިފަހުން ފާމަސީތަކުން އަމިއްލައަށް ގަންނަން ބޭސް ލިބުނު ނަމަވެސް، މިހާރު ބޮޑު އަގުގައި ގަންނަންވެސް ބޭސް ނުލިބޭ ކަމަ އޭނާ ވިދާޅުވިއެވެ.