ޑރ. ޝިފާޒާގެ ދަތުރު: ދިވެހި ނަރުހަކުން ބައިނަލްއަގްވާމީ ރިސާޗް ލީޑަރަކަށް
ދަޕްރެސް
10 މާރިޗު 2026 | އަންގާރަ | 12:13
ބަލި މީހުންނަށް އަޅާލުމާއި، މުޖުތަމައުގެ ސިއްހަތަށް އެހީތެރިވުމުގައި ނަރުހުންގެ ދައުރު ވަރަށް ބޮޑެވެ. އެންމެ އުނދަގޫ ހާލަތްތަކުގައި ބަލިމީހާއަށް އެންމެ ފުރަތަމަ ހިތްހަމަޖެހުމާއި، ހަމްދަރުދީގެ އިތުރުން ސިއްހީ ފަރުވާ ފޯރުކޮށްދޭ ބަޔަކީ ވެސް އެ މީހުންނެވެ. ޑރ. ފާތިމަތު ޝިފާޒާ (ޝިފާ) އަކީ 30 އަހަރަށްވުރެ ގިނަ ދުވަހުގެ ތަޖުރިބާ ލިބިފައިވާ ނަރުހެއް އަދި ރިސާޗަރެކެވެ.
ރިސާޗަރެއްގެ ގޮތުގައި މިހާރު މަސައްކަތް ކުރަމުން އަންނަ ޑރ. ޝިފާޒާގެ ނަޒަރުގައި ނަރުސް ކަމަކީ ވަޒީފާއަކަށް ވުރެ މާ ބޮޑު މަސައްކަތެކެވެ. އައިޖީއެމްއެޗް އިން މި ދަތުރު ފެށި ޝިފާޒާ ބުނީ، އެ ދުވަސްތަކުގެ ސަބަބުން ހަމްދަރުދީއާއި އަޅާލުމާއި އޯގާތެރިކަމާއެކު ބަލިމީހުންނަށް ހިދުމަތް ދިނުމުގެ މުހިއްމުކަމާ މެދު ވިސްނާ ފިކުރު ކުރެވުނު ކަމަށެވެ.
ބަލިމީހުންނާ ގާތުން މަސައްކަތް ކުރި ދުވަސްވަރު ސިއްހީ ހިދުމަތްތެރިންނަށް ގިނަ ގޮންޖެހުންތަކަކާ ކުރިމަތިލާން ޖެހުނު ކަމަށް ޝިފާޒާ ބުނެއެވެ. އެގޮތުން ވަސީލަތްތައް މަދުވުން ފަދަ ކަންކަމުގެ ސަބަބުން ބަލިމީހުން ދޭ ހިދުމަތަށް އަސަރު ކުރާ ކަމަށާއި އެ ހުރަސްތައް ބަލައިގަތުމުގެ ބަދަލުގައި ސިއްހީ ނިޒާމް ރަނގަޅު ކުރެވޭނެ ގޮތްތައް ހޯދަން އޭނާ އަޒުމް ކަނޑައެޅިއެވެ. އެއީ ނަރުހަކުން ރިސާޗަރަކަށް ދިއުމުގެ ވިސްނުން ވެސް އައި ހިސާބެވެ.